काठमाडौं । बालुवाटारस्थित ललितानिवास जग्गा अनियमितता प्रकरणमा ४ पूर्वसचिवसहित ४०६ जना विरुद्ध पक्राउ पुर्जी जारी गरिएको छ ।

ललितानिवासको सरकारी जग्गा व्यक्तिको नाममा नामसारी गर्ने काममा संलग्नता भएको भन्दै तत्कालीन सचिवहरु दीप बस्न्यात, छविराज पन्त, दिनेशहरि अधिकारी र नारायण गोपाल मलेगोविरुद्ध पक्राउ पुर्जी जारी गरिएको हो। तीमध्ये एक पूर्वसहसचिव सुधीर शाह पक्राउ गरिएका छन् भने अख्तियार दुरुपयोग अनुसन्धान आयोगका पूर्वप्रमुख आयुक्तसमेत रहेका दीप बस्न्यात फरार रहेका छन् ।

प्रहरी स्रोतका अनुसार ललिता निवास प्रकरणमा पूर्वसचिवहरुसहित ४०६ जनाविरुद्ध अदालतबाट पक्राउ अनुमति (पुर्जी) लिइएको हो। तीमध्ये कतिपयलाई प्रहरीले हिरासतमा राखेर अनुसन्धान अघि बढाएको छ भने कतिपयको खोजी जारी रहेको प्रहरीले बताएको छ ।

११२ रोपनी ४ आना एक पैसा जग्गा थडपेको प्रकरणमा चार वटा मुद्दामा प्रहरीले छानबिन गरिरहेको छ ।

११२ रोपनी ४ आना १ पैसा जग्गा अनियमितता भएको मुद्दा नम्बर २४ मा २०९ जनाविरुद्ध पक्राउ पूर्जी जारी गरिएको छ ।

यस्तै, पशुपति टिकिन्छा गुठीको नाममा दर्ता भएको मुद्दा नम्बर २५ मा ११० जनाविरुद्ध पक्राउ पूर्जी जारी भएको छ । टिकिन्छा गुठीको नाममा ४ रोपनी १४ आना ३ पैसा २ दाम जग्गा अपचलन भएको छ ।

दिनेशहरि अधिकारी र नारायण गोपाल मलेगो पनि यसैमा जोडिएका छन् । फाइल टिप्पणी उठाउने र सदर गर्ने काममा उनीहरुको नाम जोडिने गरेको छ । तत्कालीन प्रधानमन्त्री डा. बाबुराम भट्टराई र तत्कालीन मुख्यसचिव लिलामणि पौड्यालको नामसमेत यी मुद्दामा मुछिएको छ ।

मुद्दा नम्बर २६ (छुट जग्गा दर्ता) मा १२ आना २ पैसा जग्गा हिनामिना भएको छ र यसबारे अनुसन्धान गर्न १३ जनाविरुद्ध पक्राउ पुर्जी जारी गरिएको छ ।

प्रधानमन्त्री, प्रधानन्यायाधीश र सभामुख निवास परिसर विस्तारका लागि नक्कली मोहीलाई जग्गा सट्टापट्टारशोधभर्ना दिइएको सम्बन्धी २७ नम्बर मुद्दामा ७४ जनाविरुद्ध पक्राउ पूर्जी जारी भएको छ । यो मुद्दा २५ रोपनी ७ आना १ पैसा १ दाम जग्गा अनियमिततासँग सम्बन्धित रहेको छ ।

२०४९ सालदेखि २०६९ सालको अवधिमा ललिता निवासको १४३ रोपनी भन्दा बढी जग्गा अपचलन गरिएको थियो । अनियमिततामा तत्कालीन प्रधानमन्त्री, मन्त्रीका साथै सम्बन्धित मन्त्रालय, गुठी संस्थान र मालपोत कार्यालयका कर्मचारीहरु समेत मुछिएका छन् । अहिले नेपाल प्रहरीको केन्द्रीय अनुसन्धान व्युरो (सीआईबी) ले कीर्ते र संगठित अपराधका दफामा छानबिन गरिरहेको छ ।

छानबिनकै क्रममा प्रहरीले निर्वाचन आयोगका पूर्वआयुक्त समेत रहेका सुधीर शाह, भाटभटेनी सुपरमार्केटका मालिक मीनबहादुर गुरुङ, मालपोत कार्यालय डिल्लीबजारका पूर्वप्रमुख धर्मप्रसाद गौतम लगायतलाई पक्राउ गरिसकेको छ । तत्कालीन सहसचिव कलाधर देउजालाई भने बोलाएको बेला उपस्थित हुने गरी कागज गराएर प्रहरीले छाडेको बताएइएको छ ।