काठमाडौँ । महालक्ष्मी नगरपालिका–७ को आयोजनामा पालिकास्तरीय प्रथम वडाध्यक्ष कप उपत्यकाव्यापी जुनियर तथा क्याडेट जुडो प्रतियोगिता हुने भएको छ ।

यही पुस २१ गते हुने उक्त प्रतियोगितामा उपत्यकाका ९ पालिकाबाट एक सय ३० खेलाडीको सहभागिता रहने आयोजक वडा नम्बर ७ का अध्यक्ष बाबुराजा महर्जनले जानकारी दिनुभयो ।

प्रतियोगितामा ललितपुर र काठमाडौं महानगरपालिकाका साथै महालक्ष्मी, कीर्तिपुर, नागार्जुन, टोखा, कागेश्वरी मनोहरा, सूर्यविनायक र मध्यपुर थिमी नगरपालिको सहभागिता रहने छ ।

पुरुष÷महिलामा समान ९–९ गरी जम्मा १८ स्पर्धामा प्रतिस्पर्धा हुनेछन् । एकदिने प्रतियोगिताका खेल वडा ७ स्थित हाम्रो पाठशालामा खेलाइने छ ।रासस