काठमाडौँ — बालेन्द्र शाहको नेतृत्वमा नयाँ सरकार गठन भएसँगै नवनियुक्त मन्त्रीहरूलाई पुल्चोकस्थित सरकारी क्वाटरमा राख्ने तयारी सुरु भएको छ । यसका लागि सम्बन्धित विभागले सरसफाइ र मर्मत थालेपछि त्यहाँ हाल बसोबास गर्दै आएका न्यायाधीशहरू आफ्नो भविष्यबारे छलफलमा जुटेका छन् ।
हाल पुल्चोकको उक्त क्वाटरमा सर्वोच्च अदालतका मुख्य रजिष्ट्रार विमल पौडेलसहित १३ जना न्यायाधीश बसोबास गर्दै आएका छन् । एकै कम्पाउण्डभित्र मन्त्री र न्यायाधीश सँगसँगै बस्दा न्यायपालिकाको स्वतन्त्रता र निष्पक्षतामाथि प्रश्न उठ्न सक्ने भन्दै न्यायाधीशहरू चिन्तित देखिएका छन् । यस्तो अवस्थाले नकारात्मक सन्देश फैलाउने र न्यायसम्पादनमा समेत असर पार्न सक्ने भएकाले विकल्पका बारे छलफल गर्न लागिएको एक न्यायाधीशले बताए ।
सर्वोच्च अदालतका अर्का एक न्यायाधीशका अनुसार यस विषयमा प्रधानन्यायाधीश र वरिष्ठ न्यायाधीशबीच छलफल गरी निर्णय लिने तयारी छ । तर सरकारको तर्फबाट हालसम्म कुनै आधिकारिक जानकारी नआएकाले अन्तिम निर्णय हुन बाँकी रहेको मुख्य रजिष्ट्रार विमल पौडेलले स्पष्ट पारे ।
सहरी विकास मन्त्रालय अन्तर्गतको भवन निर्माण तथा व्यवस्थापन विभागका प्राविधिक चक्रवर्ती कण्ठले भने प्रधानमन्त्री कार्यालयको निर्देशनअनुसार हाल खाली रहेका तीनवटा क्वाटरको सरसफाइ र आवश्यक मर्मत गर्ने काम जारी रहेको जानकारी दिए ।
