काठमाडौँ । सरकारले आयातमा भन्सार दर बढाएपछि नेपाली बजारमा सुनको मूल्यले नयाँ रेकर्ड कायम गरेको छ । शुक्रबार नेपाली बजारमा सुन तोलामा १ हजार ७ सय रुपैयाँ वृद्धि हुँदै नयाँ रेकर्ड कायम गर्न पुगेको हो । आज छापावाल सुन प्रतितोला १ लाख ४२ हजार २ सय रुपैयाँ कायम हुँदै हालसम्मकै उच्च रेकर्ड कायम भएको हो । अघिल्लो दिन प्रतितोला १ लाख ४० हजार ५ सय रुपैयाँमा कारोबार भएको थियो ।
यस्तै आज तेजाबी सुनको मूल्य पनि तोलामा १ हजार ७ सय रुपैयाँले नै बढ्दै १ लाख ४१ हजार ५ सय रुपैयाँमा कारोबार भइरहेको नेपाल सुनचाँदी व्यवसायी महासंघले जनाएको छ ।
आज चाँदीको मूल्य भने तोलामा २५ रुपैयाँले घटेको छ । चाँदीको मूल्य तोलामा २५ रुपैयाँले घट्दै १ हजार ८ सय ७५ रुपैयाँमा कारोबार भइरहेको महासंघले जनाएको छ ।
सरकारले गत मंगलबार सार्वजनिक गरेको आगामी आर्थिक वर्षको बजेटमा सुनको भन्सार दर ५ प्रतिशत बढाएरपछि यसको असर स्थानीय बजारमा परेको महासंघका पूर्वअध्यक्ष तेजरत्न शाक्यले बताए ।
सुनको भाउले नयाँ रेकर्ड राख्नुमा भन्सारदर मुल कारण रहेको उनले सुनाए । गत वर्ष बढाएर १५ प्रतिशत पुर्याएको थियो । अन्तर्राष्ट्रिय बजारमा सुनको मूल्य प्रतिआउन्स २३ सय ४२ डलर पुगेको छ । बिहीबार प्रतिआउन्स २३ सय ३५ डलर थियो । एक दिनमा ७ डलर बढेको महासंघले जनाएको छ ।
