काठमाडौं । परराष्ट्रमन्त्री नारायण प्रसाद (एनपी) साउदले गोर्खा भर्तीबारे उपयुक्त समयमा सर्वसहमति जुटाएर आवश्यक निर्णय लिने बताएका छन् ।
सोमबार संसदको अन्तर्राष्ट्रिय सम्बन्ध समितिको बैठकमा बोल्दै मन्त्री साउदले भने, ‘यस्तो विषयमा सर्वपक्षीय सर्वसहमति आवस्यक हुन्छ । यस आधारमा उपयुक्त समयमा उपयुक्त निर्णय लिन्छौं ।’
भारतीय कानुनमा परिवर्तनपछि गोर्खा भर्ती रोकिएको बताउँदै उनले त्यसपछि भर्ती खुलाउन औपचारिक कूटनीतिक पहल नभएको जानकारी समेत गराए ।
भारतको ‘अग्निपथ’ योजना बमोजिम गोर्खा भर्तीमा नेपालले सहमति नजनाएपछि गत अगस्ट महिनाको अन्त्यमा भर्ना छनोट प्रक्रिया अनिश्चितकालिन रुपमा स्थगित भएको थियो ।
भर्ना लिइएका युवामध्ये निश्चित प्रतिशतलाई मात्र चार वर्षपछि भारतीय सेनामा स्थायी पदस्थापन गरिने र अन्यलाई निश्चित रकम दिएर घर फिर्ता पठाउने नीति भारत सरकारले लागू गर्ने निर्णय लिएपछि तत्कालीन शेरबहादुर देउवा नेतृत्वको सरकारले अग्निपथ योजना अनुसारको गोर्खा भर्तीमा रोक लगाएको थियो ।
सम्बन्धित विषय: एनपी
